ಗುರು ಪೂರ್ಣಿಮೆ ಮಕ್ಕಳ ಕವನ - Guru Poem | Jnana Kirana

🙏🙏ಗುರು ಪೂರ್ಣಿಮೆಯ ಶುಭಾಶಯಗಳು 🙏🙏

ಮಕ್ಕಳ ಕವನ #ಗುರು

ಗುರು

ಬೆರಳ ಹಿಡಿದು ಹೆಜ್ಜೆ ಕಲಿಸಿ

ತುತ್ತು ಮಾಡಿ ಊಟ ಉಣಿಸಿ

ಜಗವನೆಮಗೆ ಪರಿಚಯಿಸಿದ

ತಾಯಿ ಗುರುವು ಅಲ್ಲವೇ?

ಜೊತೆಗೆ ನಡೆದು ಎಡವಗೊಡದೆ

ನೆರಳಿನಂತೆ ಹಿಂದೆ ನಿಂತು

ಬಾಳ ಹಾದಿ ತೋರಿದಂತ

ತಂದೆ ಗುರುವು ಅಲ್ಲವೇ?

ಬೆರಳ ಹಿಡಿದು ಅ ಆ ಬರೆಸಿ

ಸರಿ ತಪ್ಪು ತಿಳಿಯ ಪಡಿಸಿ

ವಿದ್ಯೆ ವಿನಯ ಹೇಳಿ ಕೊಟ್ಟ

ಮೇಷ್ಟ್ರು ಗುರುವು ಅಲ್ಲವೇ?

ಏಟು ತಿಂದರೂನು ನಗುತ

ತಾಯ ಸೆರಗ ಹಿಡಿದು ಬರುತ

ಸಹನೆ ಪಾಠ ತಿಳಿಸಿ ಕೊಟ್ಟ

ಮಗುವು ಗುರುವು ಅಲ್ಲವೇ?

ಕೈಯ ಚೀಲ ಮರೆತು ಬರಲು

ಚಾಲಕನದ ಹೊತ್ತು ತರಲು

ಪ್ರಾಮಾಣಿಕತೆ ಮೆರೆದ ಆತ

ನಿಜದಿ ಗುರುವು ಅಲ್ಲವೇ?

ಒಂದಕ್ಷರಂ ಕಲಿಸಿದಾತ

ಗುರುವಾಗುವರೆಂಬುವರು

ಪ್ರತಿ ಹೆಜ್ಜೆಗು ಗುರುಗಳಿಹರು

ಕೋಟಿ ನಮನ ಅವರಿಗೆ

🖌ಅರುಣಾ ರಾವ್